aah ko chāhiye ik umr asar hote tak
kaun jiitā hai tirī zulf ke sar hote tak

dām-e-har-mauj meñ hai halqa-e-sad-kām-e-nahañg
dekheñ kyā guzre hai qatre pe guhar hote tak

āshiqī sabr-talab aur tamannā betāb
dil kā kyā rang karūñ ḳhūn-e-jigar hote tak

ham ne maanā ki taġhāful na karoge lekin
ḳhaak ho jā.eñge ham tum ko ḳhabar hote tak

partav-e-ḳhur se hai shabnam ko fanā kī ta.alīm
maiñ bhī huuñ ek ināyat kī nazar hote tak

yak nazar besh nahīñ fursat-e-hastī ġhāfil
garmī-e-bazm hai ik raqs-e-sharar hote tak

ġham-e-hastī kā 'asad' kis se ho juz marg ilaaj
sham.a har rang meñ jaltī hai sahar hote tak

tā-qayāmat shab-e-furqat meñ guzar jā.egī umr
saat din ham pe bhī bhārī haiñ sahar hote tak