royā kareñge aap bhī pahroñ isī tarah
aTkā kahīñ jo aap kā dil bhī mirī tarah

aatā nahīñ hai vo to kisī Dhab se daav meñ
bantī nahīñ hai milne kī us ke koī tarah

tashbīh kis se duuñ ki tarah-dār kī mire
sab se nirālī vaz.a hai sab se na.ī tarah

mar chuk kahīñ ki tū ġham-e-hijrāñ se chhūT jaa.e
kahte to haiñ bhale kī va-lekin burī tarah

ne taab hijr meñ hai na ārām vasl meñ
kam-baḳht dil ko chain nahīñ hai kisī tarah

lagtī haiñ gāliyāñ bhī tire muñh se kyā bhalī
qurbān tere phir mujhe kah le usī tarah

pāmāl ham na hote faqat jaur-e-charḳh se
aa.ī hamārī jaan pe aafat ka.ī tarah

ne jaa.e vaañ bane hai na bin jaa.e chain hai
kyā kījiye hameñ to hai mushkil sabhī tarah

ma.ashūq aur bhī haiñ batā de jahān meñ
kartā hai kaun zulm kisī par tirī tarah

huuñ jāñ-ba-lab butān-e-sitamgar ke haath se
kyā sab jahāñ meñ jiite haiñ 'momin' isī tarah