Mujhe sameto
Main reza reza bikhar raha hoon
Na jaane main badh raha hoon

Ya apne hi ghubar-e-safar mein har pal utar raha hoon
Na jaane main jee raha hoon

Ya apne hi tarashe hue naye raston ki tanhaiyon mein har lahza mar raha hoon
Main ek patthar sahi magar har sawaal ka baaz-gasht ban kar jawab doonga

Mujhe pukaro mujhe sada do
Main ek sahra sahi magar mujh pe ghir ke barso

Mujhe mehakne ka walwala do
Main ek samundar sahi magar aaftab ki tarah mujh pe chamko

Mujhe bulandi ki samt udne ka hausla do
Mujhe na todo ki main gul-e-tar sahi

Magar os ke bajaye lahu mein tar hoon
Mujhe na maaro

Main zindagi ke jamaal aur gahma-gahmiyon ka payambar hoon
Mujhe bachao ki main zameen hoon

Karodon karodon ki kainaat-e-baseet mein sirf main hi hoon
Jo Khuda ka ghar hoon