collage ke sab bachche chup hain kaghaz ki ik naav liye
charon taraf dariya ki surat phaili hui bekari hai

apne sab yaar kaam kar rahe haiñ
aur ham haiñ ki naam kar rahe haiñ

teġh-bāzī kā shauq apnī jagah
aap to qatl-e-ām kar rahe haiñ

dād-o-tahsīn kā ye shor hai kyuuñ
ham to ḳhud se kalām kar rahe haiñ

ham haiñ masrūf-e-intizām magar
jaane kyā intizām kar rahe haiñ

hai vo bechārgī kā haal ki ham
har kisī ko salām kar rahe haiñ

ek qattāla chāhiye ham ko
ham ye e.alān-e-ām kar rahe haiñ

kyā bhalā sāġhar-e-sifāl ki ham
nāf-pyāle ko jaam kar rahe haiñ

ham to aa.e the arz-e-matlab ko
aur vo ehtirām kar rahe haiñ

na uThe aah kā dhuāñ bhī ki vo
kū-e-dil meñ ḳhirām kar rahe haiñ

us ke hoñToñ pe rakh ke hoñT apne
baat hī ham tamām kar rahe haiñ

ham ajab haiñ ki us ke kūche meñ
be-sabab dhūm-dhām kar rahe haiñ

aap kā e'tibār kaun kare
roz kā intizār kaun kare

zikr-e-mehr-o-vafā to ham karte
par tumheñ sharmsār kaun kare

ho jo us chashm-e-mast se be-ḳhud
phir use hoshiyār kaun kare

tum to ho jaan ik zamāne kī
jaan tum par nisār kaun kare

āfat-e-rozgār jab tum ho
shikva-e-rozgār kaun kare

apnī tasbīh rahne de zāhid
daana daana shumār kaun kare

hijr meñ zahr khā ke mar jā.ūñ
maut kā intizār kaun kare

aañkh hai turk zulf hai sayyād
dekheñ dil kā shikār kaun kare

vā'da karte nahīñ ye kahte haiñ
tujh ko ummīd-vār kaun kare

'dāġh' kī shakl dekh kar bole
aisī sūrat ko pyaar kaun kare