raqs-e-mai tez karo saaz ki lai tez karo
su-e-mai-khana safiran-e-haram aate hain

sajao bazm ghazal gaao jaam taaza karo
bahut sahi gham-e-giti sharab kam kya hai

dulhan bani hui hain rahen
jashn manao saal-e-nau ke

badban naaz se lahra ke chali baad-e-murad
karvan eid mana qafila-salar aaya

Na jaane kitne parindon ne is mein shirkat ki
Kal ek ped ki taqreeb-e-ru-numai thi

gale lagā.eñ kareñ tum ko pyaar eid ke din
idhar to aao mire gul-ezār eid ke din

ġhazab kā husn hai ārā.isheñ qayāmat kī
ayaañ hai qudrat-e-parvardigār eid ke din

sañbhal sakī na tabī.at kisī tarah merī
rahā na dil pe mujhe iḳhtiyār eid ke din

vo saal bhar se kudūrat bharī jo thī dil meñ
vo duur ho ga.ī bas ek baar eid ke din

lagā liyā unheñ siine se josh-e-ulfat meñ
ġharaz ki aa hī gayā mujh ko pyaar eid ke din

kahīñ hai naġhma-e-bulbul kahīñ hai ḳhanda-e-gul
ayaañ hai josh-e-shabāb-e-bahār eid ke din

sivayyāñ duudh shakar meva sab muhayyā hai
magar ye sab hai mujhe nāgavār eid ke din

mile agar lab-e-shīrīñ kā tere ik bosa
to lutf ho mujhe albatta yaar eid ke din